FC Prishtina ka reaguar pas vdekjes së Bllazheviq: Emri i tij tashmë është shkruar më shkronja të arta në klubin tonë

Trajneri legjendar kroat, Miroslav “Çiro” Bllazheviq ndërroi jetë sot në moshën 87 vjeçare, pas një sëmundje të rëndë.

Bllazheviq ishte një figurë tejet e dashur për futbollin Kosovar, pasi që gjatë karrierës së tij kishte drejtuar edhe skuadrën e Prishtinës në edicionin 1985/86 në ish-ligën federative të ish-Jugosllavisë.

Klubi i Prishtinës ka reaguar pas vdekjes së Blazevic përmes një statusi në “Facebook”, në të cilin i jep lamtumirën e fundit legjendës kroate.

“Ai erdhi te Prishtina si shpëtimtar dhe si i tillë u largua derisa e drejtoi gjeneratën e artë të Prishtinës. Blazheviq e udhëhoqi me shumë pasion e dashuri Prishtinën në vitet e vështira të popullit tonë nën okupim duke u dhënë zemër e bashkuar të gjithë shqiptarët përreth klubit dhe stadiumit të qytetit”, ka shkruar Prishtina në “Facebook”.

“Emri i tij tashmë është shkruar më shkronja të arta në klubin tonë. Blazheviq në karrierën e tij ka drejtuar me shumë sukses edhe Kombëtaren e Kroacisë në Kupën e Botës në vitin 1998 ku e zuri vendin e tretë. Në vitin 1982, Blazheviq i solli Dinamos titullin e kampionit të Jugosllavisë pas 24 vitesh pritje. Si trajner ka punuar edhe në Zvicër, Francë, Greqi, Slloveni, Bosnje e Hercegovinë, Kinë e Iran”, ka shkruar më tej në njoftimin e Prishtinës.