Presidentja e Kosovës, Vjosa Osmani, ka vendosur që zgjedhjet e rregullta lokale në vend të mbahen më 12 tetor 2025.
Në njoftimin e Presidencës bëhet e ditur se ky vendim u mor pas shqyrtimit të kujdesshëm të propozimeve të subjekteve politike dhe analizave të detajuara, në përputhje me afatet kushtetuese dhe ligjore. Caktimi i kësaj date synon të sigurojë përgatitjen e duhur teknike dhe logjistike nga institucionet përgjegjëse, përfshirë Komisionin Qendror të Zgjedhjeve dhe organet e tjera relevante, në mënyrë që procesi zgjedhor të zhvillohet në përputhje me standardet më të larta.
Presidentja Osmani u bëri thirrje të gjitha subjekteve politike, organizatave të shoqërisë civile dhe qytetarëve që të angazhohen me përgjegjësi për të garantuar një proces zgjedhor gjithëpërfshirës, të drejtë dhe transparent.
