Prokuroria Speciale e Republikës së Kosovës ka ngritur aktakuzë ndaj R.V., M.V. dhe A.Ç., shtetas të Serbisë dhe Bosnjës, për krime lufte kundër popullsisë civile, sipas nenit 142 dhe nenit 22 të Ligjit Penal të Republikës Socialiste Federative të Jugosllavisë (LP-RSFJ), që ka qenë në fuqi gjatë periudhës kur u kryen krimet.
Hetimet kanë zbuluar se të pandehurit, si pjesëtarë të forcave të policisë në Stacionin Policor të Pejës, në bashkëpunim me forca të tjera serbe, kanë kryer krime të tmerrshme në fshatin Ozdrim dhe rrethinat e Pejës gjatë luftës në Kosovë. Këto përfshijnë vrasjen, dëbimin, shkatërrimin e pasurisë dhe keqtrajtimin e civilëve shqiptarë që nuk ishin të përfshirë në luftë.
Sipas Prokurorisë, 14 civilë shqiptarë u vranë gjatë këtyre veprimeve. Aktakuza kërkon që gjykimi të zhvillohet në mungesë, pasi të pandehurit janë ende në arrati. Prokuroria Speciale ka theksuar angazhimin e saj për të çuar para drejtësisë të gjithë ata që kanë kryer krime lufte në Kosovë.
