Pas deklaratave të fundit të Cristiano Ronaldos, i cili e ka quajtur veten lojtarin më të mirë në histori, ish-shoku i tij te Real Madridi, Karim Benzema, ka dhënë një mendim ndryshe.
Në intervistë për “TNT Sports”, pas fitores së Al-Ittihad (4-1) ndaj Al-Hilal në “Saudi Pro League”, sulmuesi francez e ka cilësuar Ronaldon (Fenomenin) si futbollistin më të madh të të gjitha kohërave.
“Çdokush mund të thotë çfarë të dojë. Nëse Cristiano mendon se është më i miri në histori, atëherë kjo vlen për të. Kjo varet nga këndvështrimi. Për mua, më i miri është Ronaldo, braziliani. Natyrisht, Cristiano është një lojtar i madh”, – deklaroi Benzema, duke shmangur polemikat e drejtpërdrejta me portugezin.
Fjalët e fituesit të “Topit të Artë” 2022 i referohen një interviste të fundit të CR7 për “La Sexta”, ku 40-vjeçari portugez (5 herë fitues i “Topit të Artë”) e cilësoi veten si futbollistin më të kompletuar ndonjëherë, duke përjashtuar emra si Pelé, Messi dhe Maradona:
- Advertisement -
“Në futboll di të bëj gjithçka: godas mirë me kokë, godas mirë me të majtën, jam i shpejtë, i fortë. E kuptoj që disa mund të preferojnë Messin, Pelén ose Maradonën, dhe i respektoj. Megjithatë, të thuash që Cristiano nuk është i kompletuar, është një gënjeshtër. Unë jam lojtari më i kompletuar i të gjitha kohërave”.
Një debat që vazhdon t’i ndajë tifozët dhe ekspertët e futbollit, mes atyre që e shohin CR7 si më të mirin e historisë dhe atyre që, si Benzema, i referohen së kaluarës për të përcaktuar fenomenin e vërtetë të futbollit.
Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
