Emisari special i Bashkimit Evropian për dialogun Kosovë-Serbi, Miroslav Lajçak, do të takohet sot në Prishtinë me kryenegociatorin e Kosovës, Besnik Bislimi. Zyra e Kryeministrit ka njoftuar se takimi pritet të nisë në orën 18:00.
“Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, pret në takim Përfaqësuesin Special të BE-së, Miroslav Lajçak”, thuhet në njoftimin e Qeverisë.
Lajçak në Athinë është takuar me kryeministrin serb, Millosh Vuçeviq, me të cilin ka theksuar se kanë diskutuar për çështjen e dialogut.
“E kam përditësuar për gjendjen në dialog dhe kemi folur për marrëdhëniet BE-Serbi”, ka shkruar Lajçaku në ‘X’.
- Advertisement -
Kurse, kryeministri serb, Millosh Vuçeviq pas takimit Lajçakun, ka theksuar se përshtypja e tij është se kryeministri i Kosovës, Albin Kurti nuk do ta formojë Asociacionin e komunave me shumicë serbe.
Një ditë më parë, Lajçaku është shprehur se momentumi i ri për anëtarësimin e vendeve të Ballkanit Perëndimor në Bashkimin Evropian nuk duhet humbur.
