Arturo Vidal, ish-mesfushori i Interit dhe Juventusit, i cili së fundmi u rikthye te Colo Colo për t’i dhënë fund karrierës së tij, duhet të përgjigjet për dëmin e lënë pas në vilën luksoze në Rio de Zhaneiro, ku banoi gjatë përvojës së tij me fanellën e Flamengos.
Futbollisti kilian nuk pagoi as qiranë, ndaj çështja përfundoi në gjykatë. Mes viteve 2022 dhe 2023, Arturo Vidal ka veshur ngjyrat e Flamengos, duke grumbulluar 51 ndeshje, 2 gola dhe 3 asiste.
Gjatë qëndrimit të tij në Brazil, ish-lojtari i Interit dhe Juves jetonte në një vilë të mrekullueshme në Rio de Zhaneiro, përballë Praia da Barra da Tijuca, e cila më pas u la pa paralajmërim në kushte të tmerrshme.
Kjo është akuza e menaxherit të pronës, i cili ka denoncuar dëme në vlerën 230 mijë dollarë. Sikur të mos mjaftonte kjo, sipas raportimeve të mediave amerikano-jugore, Vidal nuk e ka paguar pagesën e qirasë, duke akumuluar një borxh ndaj pronarëve të pronës prej gati 23 mijë dollarësh. Kiliani është denoncuar për këto fakte dhe së shpejti do të duhet të mbrohet në gjykatë.
