Policia në Shkodër ka zhvilluar një aksion anti-drogë, duke goditur një rast të tentativës për kultivim e bimëve narkotike kanabis.
Siç njofton Policia e Shtetit, gjatë operacionit policor të koduar “Luarza 1”, janë sekuestruar 37 336 kubikë me fara dhe fidanë kanabisi, një automjet, një traktor dhe sende që i shërbenin kësaj veprimtarie kriminale.
“Në zbatim të masave të ndërmarra në kuadër të planit operacional policor për parandalimin dhe goditjen që në fazë fillestare të tentativave për kultivim të bimëve narkotike, si dhe me mbështetjen e informacioneve të siguruara nga inteligjenca policore, se në fshatin Luarzë ishin mbjellë në kubikë fara dhe fidanë narkotikë cannabis sativa, me qëllim kultivimin në tokë, shërbimet e Postës së Policisë Velipojë, në bashkëpunim me ato të Komisariatit të Policisë Shkodër dhe me ato të Drejtorisë Vendore të Policisë Shkodër, organizuan dhe finalizuan operacionin policor të koduar ‘Luarza 1’. Si rezultat i operacionit, në këtë territor u gjetën dhe u sekuestruan në cilësinë e provës materiale, 37 336 kubikë me fara dhe fidanë të dyshuar narkotikë cannabis sativa, 1 automjet, 1 traktor dhe sende që i shërbenin kësaj veprimtarie kriminale”, ka thënë Policia e Shtetit, raporton Klankosova.tv.
Gjatë operacionit, policia njofton se si autorë të dyshuar të kësaj veprimtarie kriminale, u identifikua, u kap dhe u arrestua shtetasi N. L., 38 vjeç, si dhe u shpall në kërkim shtetasi P. L., 48 vjeç.
- Advertisement -
Policia tha se puna për kapjen e 48-vjeçarit, si dhe për identifikimin dhe nxjerrjen përpara përgjegjësisë penale të shtetasve të tjerë që mund të jenë implikuar në këtë rast, po vazhdon. /Klankosova.tv
