Lionel Messi po bën historinë e Inter Miami duke shënuar dhe fituar ndeshje pas ndeshjeje. 10 argjentinas tashmë ka arritur të marrë një titull, Kupën e Ligës, ndërsa tani synon të bëjë mirë në MLS. Shtatë herë fituesi i “Topit të Artë” u intervistua nga Tony Cherchi për “Apple TV” dhe ishte në gjendje të ndalej në tema të ndryshme, duke përfshirë rolin e tij pasi “t’i varë këpucët në gozhdë”. Nga ky këndvështrim, megjithatë, tërheqja nga futbolli duket diçka jo afër…
“Nëse marr një sinjal nga Beckham, çfarë do të bëj pasi të tërhiqem nga futbolli? Unë ende nuk e mendoj këtë, të jem i sinqertë. Më pëlqen të luaj, më pëlqen të jem me topin në fushë, të garoj, të stërvitem. Nuk e di sa do të luaj më shumë, por mendoj se do të mundohem të përfitoj sa të mundem, – ka thënë Messi, fjalët e të cilit janë marrë nga “AS”.
– Mendoj se për më vonë ka kohë për t’u menduar, analizuar dhe zgjedhur. Sot më e rëndësishmja është të shijoj atë që ka mbetur, çfarëdo qoftë ajo. Mund të jetë pak ose shumë, por dua ta shijoj në maksimum siç po bëj tani. Dua ta shijoj çdo moment, mbi të gjitha, sepse kjo nuk kthehet më, prandaj nuk dua të pendohem për asgjë”.
Më tej shtoi: “Lumturia ime ka qenë gjithmonë të luaja futboll dhe të kisha mundësi të argëtohesha. Sot mund të vazhdoj ta bëj këtu, kjo ishte një nga arsyet e këtij vendimi. Të kthehem për të shijuar pak nga ajo që kam humbur. Udhëtimet në kombëtare ishin momentet e mia më të lumtura, sepse më pëlqeu vendi ku isha, bashkëlojtarët. Unë doja të vija këtu për të gjetur të njëjtën gjë. Falë Zotit e gjeta”.
