Fillimi i Kupës së Botës në Australi dhe Zelandën e Re vë në qendër të vëmendjes Alisha Lehmann. Sulmuesja e Aston Villa dhe kombëtares së Zvicrës, një yll i rrjeteve sociale, nuk e nisi si titullare xhiron e parë të ndeshjeve në Grupin A, kundër Filipineve, por hyri në pjesën e dytë. Kombëtarja e saj, gjithsesi mori fitoren (2-0) dhe tri pikët e para në këtë Botëror. Le ta njohim më mirë atë.
Fillimet
E lindur në Tägertschi (në Kantonin e Bernës), më 21 janar 1999, sulmuesja e Aston Villa është marrë me futbollin që kur ishte fëmijë. Pasi nisi me ekipet mikse të të rinjve të Konolfingenit, ajo përjetoi një ndalesë të vogël si e vetmja vajzë në skuadër, duke e filluar sërish me kampionatet rajonale. Aty ajo u ngrit, deri në një transferim te Young Boys, me mundësi për të vazhduar në një grup vetëm femrash. Më 2015-2016 ajo arriti në ekipin e parë dhe më 2018 u transferua te West Ham në Angli, ku qëndroi deri në janar 2021. Në verën e të njëjtit vit, ajo u transferua tek Aston Villa, ku deri më tani ka shënuar 7 gola në 43 ndeshje.
Yll i rrjeteve sociale
- Advertisement -
Futbollistja me ndikim, Alisha Lehmann është një yll i rrjeteve sociale. Këtë e demonstron hulumtimi më i fundit i “Nielsen”, bazuar në “InfluenceScope”, mjeti që vlerëson numrin total të ndjekësve, rritjen e tyre, angazhimin dhe parametra të tjerë, siç është vlera mesatare e markës për postim në Instagram. Sipas të dhënave të studimit, vitin e fundit ajo ka kaluar Alex Morgan për sa i përket ndjekësve, duke fituar 75%. Për të qenë i qartë, ajo tani ka më shumë se 13 milionë ndjekës në Instagram dhe një nga postimet e saj “prodhon” mbi 300.000 dollarë për markat.
Tenis
Jashtë fushës së blertë, bukuroshja zvicerane e pëlqen gjithmonë sportin. Një nga pasionet e saj është tenisi, siç konfirmohet edhe nga shkrepjet e shpërndara në rrjetet sociale, në të cilat lojtarja shfaqet e buzëqeshur dhe e angazhuar në ndeshje, edhe me shoqet e skuadrës. Në një postim të fundit, ajo ndau fushën e lojës me Géraldine Reuteler dhe Rachel Rinast.
Trajnimi
Një pjesë e rëndësishme e rutinës së saj i kushtohet stërvitjes, jo vetëm në fushë, por edhe në palestër. Për Alisha, një faktor kyç për të vazhduar të ecë përpara në një rrugë kërkuese është mbështetja e njerëzve të afërt në jetën e saj të përditshme: “Ndjenja e mbështetjes është e rëndësishme për mua në të gjitha aspektet e jetës. Mbështetja e mirë kur luaj më jep besimin që kam nevojë për t’u çlodhur, për të pasur përqendrimin tim të plotë në lojë dhe për të mbështetur shoqet e skuadrës”.
