Ministri i Mbrojtjes, Armend Mehaj së bashku me ambasadorin e ShBA-së, Jeffrey Hovenier, ka takuar senatorin Gary Peters, me të cilin ka diskutuar për situatën aktuale gjeopolitike, luftën në Ukrainë, kontributin e ofruar nga Kosova si pjesë e Grupit të Kontaktit për Mbrojtjen e Ukrainës.
Përmes një njoftimi për media, bëhet e ditur se ministri Mehaj gjatë këtij takimi ka theksuar faktin e mbështetjes që Rusia gjen nga Serbia në Ballkan, si i vetmi shtet që në vazhdimësi ka përkrahur politikat pro-ruse dhe refuzon të vendos sanksione ndaj këtij agresori.
Ai gjithashtu ka bërë të ditur se e ka njoftuar senatorin për zhvillimet në Kosovës, procesin e dialogut me Serbinë, si dhe avancimet e Forcës së Sigurisë së Kosovës në implementimin e Planit Gjithëpërfshirës të Tranzicionit, bashkëpunimin me partnerët tanë strategjik.
Mehaj ka thënë ta ketë njoftuar senatori edhe për ushtrimin ndërkombëtar që po zhvillohet në Kosovë, Defender Europe ’23, si shembull konkret që dëshmon ngritjen e kapaciteteve të Forcës së Sigurisë së Kosovës për të siguruar ruajtjen e paqes dhe stabilitetit në vend, rajon dhe më gjerë.
- Advertisement -
Në anën tjetër senator Gary shprehu vlerësimin e tij të lartë për avancimet që Kosova ka bërë jo vetëm në fushën e sigurisë dhe mbrojtjes por gjithashtu në mirëqeverisjen e vendit në shumë drejtime, duke dëshmuar qëndrimin pro vlerave perëndimore dhe pro NATO-s, aleancës që stoikisht mbështetë ruajtjen e paqes dhe pavarësisë së shteteve.
“ShBA është aleati ynë strategjik me të cilin na bashkon e kaluara dhe e ardhmja të cilën do e ndërtojmë, me Kosovën si pjesë e BE dhe NATO-s”, tha Mehaj.
