Aleanca për Ardhmërinë e Kosovës (AAK), ka kërkuar rishikimin e buxhetit për vitin 2023, duke përfshirë në të edhe rritjen e pagave në sektorin publik, ndërsa ka ftuar në interpelancë ministrin e Financave, Hekuran Murati. Këtë kërkesë të kësaj partie opozitare e ka konfirmuar në një konferencë për media shefi i Grupit Parlamentar të AAK-së, Besnik Tahiri.
Sipas tij, ndërhyrja e qeverisë në strukturën e të hyrave dhe të shpenzimeve buxhetore ka qenë shumë e dëmshme në rrjedhat e zhvillimit në vend, duke i ngritur normat e tatimit në njërën anë, e në anën tjetër duke i bllokuar investimet kapitale.
“Vetëm për dy vjet qeverisje janë bllokuar rreth 500 milionë euro të investimeve kapitale, me çka është dëmtuar ekonomia e vendit për rreth 200 milionë euro si pasojë e inflacionit dhe vonesës se investimeve kapitale”, u shpreh ai.
Tahiri tha se gjendja e rëndë socio–ekonomike në vend, e krijuar nga niveli i lartë i inflacionit, rritja e çmimeve të konsumit, shtrenjtimi i çmimit të energjisë dhe vendimi për rritjen e tatimit në pronë, ka bërë që qytetarët të përballen me vështirësi të shumta.
- Advertisement -
Sipas tij, rritja e pagave në sektorin publik do të ishte zgjidhje që do të lehtësonte sado pak këtë situatë, pasi kjo është kërkesë e kohës.
“Kjo rritje do të duhej të ndodhte menjëherë me rishikimin buxhetor dhe kjo do të ndikonte në rritjen e konsumit të përgjithshëm por edhe indirekt në rritjen e pagave në sektorin privat. Nëse ky veprim nuk ndodh menjëherë, Kosova rrezikon të zbrazet dhe të mbes pa shumë profesionistë të zotë”, u shpreh Tahiri.
Shefi GP të AAK-së tha se kërkesë e grupit parlamentar të kësaj partie është që të sillet sa më parë në Kuvendin e Republikës së Kosovës rishikimi i buxhetit për vitin 2023 dhe të përfshihet në këtë rishikim rritja e pagave në sektorin publik.
