Presidenti amerikan Joe Biden dhe homologu i Koresë së Jugut, Yoon Suk-yeol, kanë arritur një marrëveshje të re që përfshin planet për të vendosur një nëndetëse bërthamore amerikane në Korenë e Jugut.
Marrëveshja është një përpjekje e ShBA-së për të treguar mbështetje për Korenë e Jugut dhe për të ndihmuar në parandalimin e sulmeve nga fqinji i saj, Koreja e Veriut.
Në këmbim, Koreja e Jugut ka rënë dakord të mos ndjekë një program të armëve bërthamore.
Marrëveshja, e quajtur Deklarata e Uashingtonit, do të forcojë bashkëpunimin ShBA-Kore e Jugut, tha Biden.
- Advertisement -
Ai foli gjatë një konference për shtyp të mërkurën së bashku me Yoon, i cili është në Uashington këtë javë për të folur për një mori çështjesh, duke përfshirë luftën në Ukrainë, ndryshimin e klimës, bashkëpunimin kibernetik dhe fuqinë bërthamore.
Yoon tha se Deklarata e Uashingtonit shënoi një hap “të paprecedentë” për të rritur parandalimin e zgjeruar, një angazhim nga ShBA-ja për të penguar sulmet dhe për të mbrojtur aleatët amerikanë duke përdorur fuqinë e saj ushtarake, përfshirë armët bërthamore, shkruan BBC, përcjell Klankosova.tv
Deklarata vjen mes shqetësimeve në rritje për kërcënimet bërthamore nga Koreja e Veriut, ndërsa vendi kryen një numër rekord të testeve të raketave balistike.
Marrëveshja e re është rezultat i negociatave që u zhvilluan gjatë disa muajve.
Sipas marrëveshjes, ShBA-ja do të synojë të ndërmarrë hapa për të “bërë parandalimin e saj më të dukshëm nëpërmjet vendosjes së rregullt të aseteve strategjike, duke përfshirë një vizitë të nëndetëses balistike bërthamore amerikane në Korenë e Jugut, e cila nuk ka ndodhur që nga fillimi i viteve 1980”.
- Advertisement -
Të dy palët do të zhvillojnë gjithashtu një grup konsultativ bërthamor për të diskutuar çështjet e planifikimit bërthamor dhe strategjik.